चितवन । चितवनमा श्रीमतीलाइ्र्र मृत अवस्थामा भेटिएपछि श्रीमान विरुद्ध प्रहरीमा जाहेरी परेको छ । जिल्लाको खैरहनी नगरपालिका–१ स्थित सिमलघारीमा बस्ने ४२ वर्षीया लक्ष्मी मिजार आइतबार बिहान मृत फेला परेकोमा उनको हत्या आशंकामा उनका श्रीमान रमेश मिजार विरुद्ध जाहेरी परेको हो ।

राति छुट्टै कोठामा सुतेको भनिएकी लक्ष्मी बिहान दराजको ह्याण्डलमा पासो लागेको अवस्थामा मृत भेटिएकी थिइन् । बिहान अवेरसम्म नउठेपछि आइतबार बिहान साढे १० बजे ढोका फुटाउँदा उनी मृत अवस्थामा भेटिएको उनका पति रमेशले दाबी गरेका छन् ।

४२ वर्षीय रमेशका अनुसार उनी छुट्टै कोठामा सुतेकी थिइन् । तर, माइती पक्षले रमेशको कुरा अस्विकार गरेका छन् । भरतपुर अस्पतालमा पोष्टमार्टमपछि आफन्तले शव बुझेका छन् । रमेशलाई पक्राउ गरेर घटनाबारे अनुसन्धान भइरहेको बताइएको छ ।