सर्लाही । सर्लाहीको कौडेना गाउँपालिकामा निर्माण भएको सामुदायिक अस्पतालको उदघाटनका लागि मंगलबार जनकपुर हुदै सर्लाही पुगेका स्वास्थ्य तथा जनसंख्या मन्त्री मोहनबहादुर बस्नेतको त्यहाँका नेता कार्यक्रतादेखि सर्वसाधारणले भव्य स्वागत गरेका छन् ।

बिहान जनकपुर पुगेका मन्त्री बस्नेतको स्वागतका लागि फुलमाला लिएर ठूलो समूहमा नेता कार्यक्रतादेखि सर्वसाधारण उपस्थित थिए । उनीहरुले मन्त्री बस्नेतलाई साच्चिकै काम गरेर देखाउने मन्त्रीको रुपमा बस्नेतलाई फुल मालाले स्वागत गर्न चाहेको बताए ।

जनकपुरपछि मन्त्री बस्नेत सर्लाहीको कौडेना पुग्दा त्यहाँका सर्वसाधारणले भव्य स्वागत गरेका थिए । माला लगाएर स्वागत गर्नेहरुको भिड छिचोल्न मन्त्री बस्नेतलाई हम्मे हम्मे परेको थियो । मन्त्रीको स्वागतका लागि माला बोकेर आएकी फुलपरासीकी प्रमिला यादवले भनिन, हामीलाई पनि यस्तै काम गर्ने नेता चाहिएको छ ।

उहाँको काम गराईबाट हाम्रा मेधशका नेताहरुले पनि सिकून भनेर स्वागत गर्न आएकी हूँ । अस्पताल उदघाटनका लागि मन्त्री बस्नेत आउने थाहा पाए पछि ठूलो संख्यामा सर्वसाधारणमात्र नभएर विभिन्न दलका नेता कार्यक्रता पनि माला लगाएर बस्नेतको स्वागत गरेका थिए ।

कार्यक्रममा एक मधेशी नेताले भने, जनताको पक्षमा काम गर्ने नेतालाई जनताले सम्मान गर्न कन्जुस्याई गर्दैनन । तर हामीलाई पनि यस्तै नेताको खाचो छ । त्यसपछि मलंगवा अस्पतालको अवलोकनमा निस्कदा पनि मन्त्री बस्नेतको भव्य स्वागत गरिएको थियो । मन्त्री बस्नेतले आफु सबै नेपालीको स्वास्थ्य मन्त्री भएकाले मन्त्रालयले सबैलाई समान रुपले व्यवहार गर्ने बताए ।