गलकोट (बागलुङ) । स्वास्थ्य तथा जनसङ्ख्या मन्त्री प्रदीप पौडेलले आज धौलागिरि अस्पताल निरीक्षण गरेका छन् ।

उनले अस्पतालको सेवा प्रवाह, जनशक्ति तथा वर्तमान अवस्थाबारे जानकारी लिएका हुन् । अस्पताल सुधारका लागि अस्पतालको यथार्थ अवस्था बुझ्न आवश्यक रहेको बताउँदै मन्त्री पौडेलले अस्पताललाई स्तरवृद्धि गर्न आवश्यक रहेको बताए।

मन्त्री पौडेलले अस्पतालको सेवाका विषयमा अस्पतालमा भर्ना भएका बिरामीलाई समेत सोधपुछ गरेका थिए । उनले आकस्मिक कक्ष, बहिरंग सेवा, अन्तरंग सेवा, डायलासिस सेवा कक्षलगायतको अवलोकन गरेको अस्पतालका मेडिकल सुपरिटेन्डेन्ट डा. किरण तिवारीले जानकारी दिए।

५० श्ययाको अनुमति रहेको अस्पतालको स्ववृद्धि गरी एक सय शय्या बनाउन सहजीकरण गर्ने मन्त्री पौडेलले प्रतिबद्धता जनाए । उनले प्रदेशअन्तर्गतको अस्पतालको रूपमा रहेको यस अस्पताललाई तत्काल अस्थायी चिकित्सक राखेर भए पनि एक सय श्ययामा स्तरवृद्धिका लागि अनुमति दिने बताए ।

“अस्पतालले क्षमताभन्दा बढी सेवा दिएको छ, स्तरवृद्धि भएको छैन प्रदेशले दुई सय श्ययामा स्तरवृद्धि गर्ने योजना बनाएको रहेछ, तत्कालै एक सय श्ययामा स्तरवृद्धि गर्दा सेवा प्रदानमा सहज हुन्छ”, मन्त्री पौडेलले भने, “अस्पतालप्रति जनताको भरोसा धेरै रहेको पाएँ, बिरामीको चाप समेत धेरै रहेछ, उपकरण र चिकित्सक थप गर्न संघ सरकारले प्रदेश सरकारसँग समन्वय गरेर काम गर्छ ।”