काठमाडौं । कैलालीको मोहन्याल गाउँपालिका अध्यक्ष देवीदत्त उपाध्याय (हिमशिखर)सहित १५ जनालाई विशेष अदालतले सफाइ दिएको छ । उनीहरुले राजश्व रकम हिनामिनासम्बन्धी मुद्दामा सफाइ पाएका हुन् ।

अदालतले राजश्व रकम हिनामिनासम्बन्धी मुद्दाका मोहन्याल गाउँपालिका अध्यक्ष देवीदत्त उपाध्यायसहित १५ जना प्रतिवादीलाई न्यायाधीशहरू यमुना भट्टराई, बलभद्र बास्तोला र डा। खुशीप्रसाद थारुको संयुक्त सफाइ दिएको हो ।

अदालतमा मुद्दा परेपछि वर्तमान अध्यक्ष उपाध्यायले काम गर्न पाएका थिएनन् । अध्यक्ष उपाध्यायलाई मुद्दा लागेपछि गाउँपालिका कार्यबाहक अध्यक्षले चलाउँदै आएका थिए ।

अख्तियार दुरुपयोग अनुसन्धान आयोगले तत्कालीन अध्यक्ष स्व। नवलसिंह रावलसहित १४ जनाविरुद्ध विशेष अदालतमा मुद्दा दायर गरेको थियो । तत्कालीन गाउँपालिका उपाध्यक्ष पूजादेवी बुढामगर, सबै वडाका अध्यक्षहरू, प्रमुख प्रशासकीय अधिकृत र निर्माण व्यवसायीसमेतलाई विपक्षी बनाइ बनाइएको थियो । अहिलेका अध्यक्ष उपाध्याय त्यतिबेला वडा नम्बर २ का अध्यक्ष थिए ।

उक्त मुद्दामा सफाइ पाउनेहरु वडा नम्बर ३ का अध्यक्ष नन्दबहादुर गिरी पनि हुन्, उनी फेरि वडाध्यक्षमा विजयी भएका थिए । उनलाई मुद्दा लागेकाले कामकाजबाट बञ्चित थिए । उक्तमा मुद्दामा सफाइ पाउने जनप्रतिनिधिहरु फेरि आफ्नो कामकाजमा र्फकन पाउने भएका छन् ।
गाउँपालिका पदाधिकारी र व्यवसायी कम्पनी ‘न्यू बडिमालिका’ निर्माण सेवाको मिलेमतोमा नदीजन्य सामग्रीको उत्खनन र बिक्री वितरणमा भ्रष्टाचार भएको अख्तियारको आरोप थियो ।