काठमाडौं । नेपाली कांग्रेसका सांसद सुनिल शर्माले रवि लामिछानेलाई सरकारले जनावरलाई जस्तो व्यवहार गरेको बताएका छन् । मंगलबार काठमाडौंमा पत्रकार सम्मेलनमा उनले यस्तो बताएका हुन् ।

सांसद शर्माले प्रधानमन्त्री र गृहमन्त्रीसँग तीन दिनभित्र रवि लामिछानेको मुद्दा अदालतमा पेस गराउन माग गरे ।

उनले सरकारले पूर्वगृहमन्त्री रवि लामिछानेलाई गिरफ्तार गरेर १० दिनमा अदालत लैजानुपर्ने भए पनि अहिलेसम्म अमानवीय व्यवहार गरिएको बताए ।

उनले भने, ‘सरकारले पूर्वगृहमन्त्रीलाई जनावरको जस्तो व्यवहार गरेको छ । लोकतान्त्रिक र प्रजातान्त्रीक व्यवस्थामा अमानवीय कार्यको म घोर भर्त्सना गर्न चाहन्छु । सरकारमा कम्युनिस्ट पार्टीमात्रै छैन, नेपाली कांग्रेस पनि छ । सरकारमा पार्टी सभापतिको श्रीमती जानुभएको छ । कानूनको विद्यार्थी नै गृहमन्त्री हुनुहुन्छ । नेपाली कांग्रेसको गृहमन्त्री भएको बेलामा न्यायिक निरुपणको विषय भएकाले १० दिनभित्रमा अदालतमा बुझाउनुपर्ने भए पनि नियतवश जानीजानी मानसिकरूपमा कमजोर बनाउनको निम्ति विभिन्न ठाउँमा कुदाउने काम भएको छ ।