काठमाडौं । सरकारले सुदूरपश्चिम र जाजरकोटमा भूकम्पले पु¥याएको क्षतिको विस्तृत मूल्यांकन (डीडीए) गर्ने निर्णय गरेको छ । आइतबार सिंहदरबारमा बसेको विपद् जोखिम न्यूनीकरण तथा व्यवस्थापन कार्यसमितिको बैठकले यस्तो निर्णय गरेको हो ।

गृहमन्त्री रमेश लेखकले बैठकपछि सञ्चारकर्मीहरूसँग कुरा गर्दै गत असोजमा काठमाडौं लगायतका क्षेत्रमा आएको बाढी, पहिरोको क्षतिको विस्तृत मूल्यांकन (डीडीए) गर्ने निर्णय समेत गरेको बताएका छन् । उनले डीडीए सम्पन्न भइसकेका क्षेत्रहरूमा सरकारले बनाएको मापदण्डअनुसार पुनर्निर्माणको काम प्रारम्भ गर्ने निर्णय भएको उल्लेख गरे ।

गृहमन्त्री लेखकका अनुसार बैठकमा बझाङ, बाजुरा र जाजरकोटमा भूकम्पले पु¥याएको क्षति र त्यसको पूनर्निर्माणको लागि आवश्यक कानुनी एवं आर्थिक विषयमा पनि छलफल भएको प्रष्ट पारे । उनले उक्त निर्णयहरू विपद् जोखिम न्यूनीकरण तथा व्यवस्थापन राष्ट्रिय परिषद्को बैठकमा पेस गरिने बताए । राष्ट्रिय परिषद्को बैठकबाट सदर भएपछि यी निर्णयहरू कार्यान्वयनको चरणमा जाने जानकारी दिए ।
विपद् जोखिम न्यूनीकरण तथा व्यवस्थापन राष्ट्रिय परिषद्को बैठक बालुवाटारमा बस्दै छ ।