गणेश शर्मा,
काठमाडौं, माघ १५ । आगामी माघ १७ गते देखि २५ गते सम्म नेपालमा सुरु हुन लागेको त्रिकोणात्मक टि ट्वान्टी आई सिरिजको लागि नेपाली टोलीको घोषणा भएको छ ।

नेपाल, नेदरल्याण्ड्स र थाइल्याण्डको महिला टोली बीचमा संचालन हुन लागेको त्रिकोणात्मक सिरिजको लागी नेपाल क्रिकेट संघ (क्यान) ले आइतवार इन्दु बर्माको कप्तानीमा १५ सदस्यीय टोलीको घोषणा गरेको हो ।

टोलीमा पुर्व कप्तान रुबिना क्षेत्री, सिनियर खेलाडि सिता राना मगर सहित १९ बर्ष मुनिको नेपाली महिला टोलि कि कप्तान पुजा महतोलाई समाबेश गरिएको छ । यस्तै अन्य खेलाडीमा बिन्दु रावल, सम्झना खड्का, कविता कुवँर, ममता चौधरी, राजमती ऐरी, कविता जोशी, रोमा थापा, मनिषा उपाध्याय, अलिसा कुमारी यादव, रेवती धामी, इश्वरी बिष्ट रहेका छन ।

नेपालले नेदरल्यान्ड सँग माघ १७ गते नै उद्घाटन खेल खेल्दै सिरिजको सुरुवात गर्नेछ । सिरिजमा सहभागी टोलीले एकअर्कासँग ३ पटक खेल्नेछन । लिग चरणको अंक तालिकाको शीर्ष स्थानमा रहने टोली विजेता बन्नेछ ।

नेपालले पहिलो पटक सन् २०२२ को मे महिनामा युगाण्डा सँग घरेलु सिरिज खेलेको थियो । करिब ३ बर्षको अन्तरालमा नेपालले दोश्रो पटक घरेलु सिरिज खेल्दै छ ।

यस्तो छ त्रिकोणात्मक सिरिजमा नेपालको खेलतालिका

माघ १७ गते – नेदरल्याण्ड्ससँग
माघ १९ गते – थाइल्याण्डसँग
माघ २० गते – नेदरल्याण्ड्ससँग
माघ २२ गते – थाइल्याण्डसँग
माघ २३ गते– नेदरल्याण्ड्ससँग
माघ २५ गते – थाइल्याण्डसँग