काठमाडौं । नेकपा एमालेनिकट नेपाल निजामती कर्मचारी संगठन, उपत्यका प्रदेश कमिटिको दोस्रो अधिवेशनबाट महासचिवमा झापाका सूर्यबहादुर ठटाल चयन भएका छन् । संगठनको अध्यक्षमा कृष्णा कँडेल, उपाध्यक्षमा दिनेश खत्री र प्रमिला दाहाल, सचिवमा विरेन्द्रजंग शाही, पुरुषोत्तम सिग्देल र दिनेश कुमार रोकाय तथा कोषाध्यक्षमा हरिलाल कँडेल रहेको २१ सदस्य कार्यसमिति चयन भएको हो ।

संगठनका केन्द्रीय अध्यक्ष लेखनाथ कोइरालाको प्रमुख आतिथ्यमा सम्पन्न अधिवेशनले नयाँ तथा जुझारु कार्य समिति चयन गरेको महासचिव ठटालले बताए । नेपाल निजामती कर्मचारी संगठन निजामती कर्मचारीहरूको सबैभन्दा ठूलो र जेठो संगठन हो । पहिलो पटक भएको आधिकारिक ट्रेड युनियनको निर्वाचनमा ११७ स्थानमध्ये ८० स्थानमा विजय हुँदै देशकै सबैभन्दा ठूलो सगठनको रुपमा स्थापित छ ।

उपत्यका प्रदेश कमिटीको कार्यक्षेत्र मुख्यतयः संधीय मन्त्रालयहरु, सर्वोच्च अदालत, महालेखा नियन्त्रकको कार्यालयलगायत देशको प्रमुख प्रशासनिक क्षेत्र रहेकोले पनि यो कमिटीलाई अर्थपूर्ण रुपमा लिने गरिएको छ ।

महासचिवमा निर्वाचित ठटाल लामो समय विधार्थी राजनीतिमा क्रियाशील रहँदै आएका थिए । ठटालसँग यसअघि मोरङ जिल्ला कमिटी सदस्य र केन्द्रीय परिषद् सदस्यसहित संगठनका विभिन्न जिम्मेवारीमा बसेर काम गरेको लामो अनुभव छ ।