इन्दिरा निरौला
गाढा अँध्यारो रातहरूमा
आशाको दियो निभ्न लागेको थियो,
स्वतन्त्रताको सास थिचिएको थियो,
सपनाहरू बन्दीगृहमा कैद थिए।

तर, कतै कसैका मुटुहरू
भतभती जलिरहेका थिए,
कतै कसैका आँसुहरू
रगत बनेर बगिरहेका थिए।
निर्दयी शासनको साङ्लो भाँच्न
कसैको सिन्दूर मेटियो,
कसैको काँख रित्याइयो,
कसैको नसा चिथोरियो ।

रगतको घाम उदाएपछि
नयाँ बिहानी फक्रियो,
निसासिएको धर्तीमा
स्वतन्त्रताको वसन्त आयो ।
गर्जिए, दह्रो गरी गर्जिए,
स्वतन्त्रता ! स्वाभिमान !
प्रजातन्त्र ! अधिकार !
तर के थाहा,
रगतले लेखिएको इतिहास
बिर्सिन थालिन्छ भन्ने !

आज फेरि सोच्छु—
प्रजातन्त्रको धून
कसको रुवाइबाट बनेको हो !
कसको चिताको खरानीबाट उठेको हो ?
कसका सपनाहरू जलाएर
हाम्रा बाटाहरू उज्यालो पारिएको हो ?

हे, स्वतन्त्रताको सन्तानहरू !
आफ्नै सपनाहरू बेचेर
फूलको थुँगा साट्ने बेला होइन ।
त्यो इतिहास बिर्सियौ भने,
फेरि कोही जेलिन्छ,
फेरि कोही मारिन्छ,
फेरि कोही उठ्छ,
फेरि कोही रुन बाध्य हुन्छ ।

बिर्सिनु हुँदैन,
रगतले लेखिएको इतिहास
कहिल्यै बिर्सिनु हुँदैन !
७५ औं प्रजातन्त्र दिवसको शुभकामना !
लेखकः (नेपाली कांग्रेसकी महासमिति सदस्य तथा भूमि आयोग सिन्धुलीकी सदस्य हुन् ।)