बनियानी । चोरीका घटना बढ्न थालेपछि झापा उद्योग वाणिज्य सङ्घले शान्ति–सुरक्षा माग गरेको छ ।

संघले आज भद्रपुर नगरपालिकामा नगर क्षेत्रमा चोरीको घटना बढेको भन्दै शान्ति–सुरक्षाको माग गर्दै ज्ञापनपत्र बुझाएको छ ।

सङ्घका उपाध्यक्ष सन्तोष धमलाको नेतृत्वमा नगरपालिका पुगेको उद्योगी–व्यवसायीको टोलीले नगरप्रमुख गणेश पोखरेललाई ज्ञापनपत्र बुझाएको हो ।

उपाध्यक्ष धमलाले भद्रपुर क्षेत्रका व्यावसायिक प्रतिष्ठानहरूमा केही दिनयता चोरीका घटना बढ्दै गएकाले नगरपालिकामा सुरक्षाको माग गर्दै ज्ञापनपत्र बुझाइएको बताए ।

उनले भने“दिउँसै चोरीका घटना भइरहेका छन्”। “स्थानीय सरकारलाई सुरक्षा माग गर्दै ज्ञापनपत्र बुझाएका हौँ ।”

सङ्घले नगरमा सुरक्षा व्यवस्था मजबुत बनाएर त्रासितरहित वातावरणमा उद्योग–व्यवसाय सञ्चालन गर्ने वातावरण बनाइदिन समेत आग्रह गरेको छ ।