तनहुँमा स्वर्णिम वाग्ले र बारामा रमेश खरेलले रास्वपाबाट उम्मेदवारी दिने
180
sharesकाठमाडौं । नेपाली कांग्रेस परित्याग गरि अर्थविद् स्वर्णिम वाग्ले राष्ट्रिय स्वतन्त्र पार्टी (रास्वपा)मा प्रवेश गरेसँगै पूर्वडीआईजी रमेश खरेल पनि त्यतै लागेका छन् । मंसिर ४ गतेको निर्वाचनमा काठमाडौं क्षेत्र नं. १ को उम्मेदवार रहेका खरेल बैशाख १० गते हुने उपनिर्वाचनमा राष्ट्रिय स्वतन्त्र पार्टीको तर्फबाट बारा–२ बाट उम्मेदवार बन्न लागेका हुन् ।
रास्वपाले बिहीबार राति सार्वजनिक गरेको सम्भावित उम्मेदवारको सूचीमा ३ निर्वाचन क्षेत्रमा ६ जना सम्भावित उम्मेदवार रहेका छन् । चितवनको क्षेत्र नं। २ मा पार्टी सभापति रवि लामिछाने रहेका छन् भने तनहुँको क्षेत्र नं। १ मा डा। स्वर्णिम वाग्ले, ईश्वर लामिछाने र डा। रुपक विक घिमिरे रहेका छन् ।
चितवन २ मा रवि लामिछाने नै पक्कापक्की उम्मेदवार रहेका छन् भने तनहुँमा स्वर्णिम वाग्ले नै बलिया उम्मेदवार देखिएका छन् । त्यस्तै बारा–२मा रमेश खरेल र युवराज न्यौपानेलाई रास्वपाले सम्भावित उम्मेदवारका रुपमा अघि सारेको छ ।
मंसिर ४ गतेको निर्वाचनमा चितवन–२ बाट निर्वाचित लामिछाने नागरिकता दुरुपयोगमा दोषी ठहर भएपछि माघ १३ गते पदमुक्त भएका थिए । त्यस्तै तनहुँबाट विजयी नेपाली कांग्रेसका रामचन्द्र पौडेल राष्ट्रपति र बारा–२ बाट विजयी जनता समाजवादी पार्टीका रामसहाय प्रसाद यादव उपराष्ट्रपति बनेपछि तीनवटै निर्वाचन क्षेत्र रिक्त रहेका हुन् ।
वि.सं.२०७९ चैत १७ शुक्रवार ११:००