काठमाडौं । नेपाली कांग्रेसका केन्द्रीय सदस्य डा. शेखर कोइरालाले नक्कली भुटानी शरणार्थी प्रकरणमा संलग्न जोसुकै भए पनि कारबाहीको दायरामा ल्याउनु पर्ने बताएका छन् । आज विराटनगर विमानस्थलमा पत्रकारहरुसँगको छलफलका क्रममा डा। कोइरालाले यो प्रकरण राष्ट्रियस्तरमा मात्रै नभएर अन्तर्राष्ट्रिय स्तरमासमेत जोडिएकाले यसमा संलग्न जो कसैलाई पनि छोड्न नहुने बताएका हुन् ।

आज आफ्नो गृहनगर पुगेका डा। कोइरालाले नक्कली शरणार्थी बनाएर अमेरिका लैजान गरिएको कामले अन्तर्राष्ट्रियस्तरमै देशको बदनामी भएको बताए । नक्कली शरणार्थी प्रकरण लज्जास्पद विषय भएको भन्दै उनले प्रहरी प्रशासनले अनुसन्धान अघि बढाएको र यसलाई अझ तदारुकता देखाएर संलग्न सबैलाई कारबाही गर्नु पर्ने बताए ।

यस प्रकरणमा नाम जोडिएपछि प्रहरीले आज मात्रै कांग्रेसकेन्द्रीय सदस्य तथा पूर्वगृहमन्त्री बालकृष्ण खाँण र उनका स्वकिय सचिय नरेन्द्र केसीलाई पक्राउ गरेको छ । यससँग प्रहरीले हालसम्म यो प्रकरणमा जोडिएका १२ जनालाई पक्राउ गरेको छ ।