काठमाडौं । सिकलसेल एनिमिया र थाल्सेमियाको उपचारका लागि छुट्टै अस्पताल निर्माण हुने भएको छ। बाँकेको जानकी गाउँपालिका ३ नहरपुर्वामा सिकलसेल सामुदायिक अस्पताल तथा अनुसन्धान केन्द्रको शहरी विकासमन्त्री मेटमणि चौधरीले शिलान्यास गरेका हुन् ।

शिलान्यास कार्यक्रममा मन्त्री चौधरीले सिकलसेल थारु समुदायको मात्र समस्या नभएको बताए। सिकलसेल अधिकांश थारु समुदायमा देखिएपनि यो अन्य समुदायको पनि जनस्वास्थ्य समस्या भएको प्रष्ट पारे। सिकलसेल अस्पताललाई मल्टिहेल्थ सर्भिस दिने अस्पतालको रुपमा विकास गरिनुपर्नेमा उनको जोड छ ।

‘अहिले थारु समुदायमा मात्र सिकलसेल देखिएको छ । सिकलिङ गर्ने हो भने अन्य समुदायमा पनि देखिन सक्छ,’ उनले भने, ‘यो अस्पताललाई सिकलसेलको उपचार गर्ने अस्पतालको रुपमा मात्र विकास गर्न हुँदैन । सिकलसेलका विरामीलाई विशेष सेवा दिए पनि अन्य रोगको पनि उपचार गर्ने थलोको रुपमा विकास गर्न जरुरी छ ।’

उनले सिकलसेल अस्पताल तथा अनुसन्धान केन्द्र भवन निर्माण गर्न शहरी विकास मन्त्रालयले सहयोग गर्ने प्रतिवद्धता जनाए । उनले थारु समुदायका लागि सिकलसेल अस्पताल महत्वपूणर् भएको बताउँदै यसको दायित्व सरकारले लिनुपर्ने बताए ।

थारु स्वास्थ्यकर्मी समाजका अध्यक्ष एवम् सिकलसेल सामुदायिक अस्पतालका अध्यक्ष जीवराज चौधरीले भेरी अस्पतालले सिकलसेलका विरामीको उपचार गर्दै आएपनि उचित ब्यवस्थापन नहुँदा विरामीले दुख पाएको बताए । उनका अनुसार पश्चिम नेपालका करिव एकलाख थारुलाई सिकलसेल छ । उक्त अस्पताल १० कट्ठा जमिनमा निर्माण हुने छ ।