काठमाडौं । नेकपा (एमाले)का अध्यक्ष केपी शर्मा ओलीले पार्टीको अनुमतिबिना विदेश जाने काम नगर्न सांसदलाई निर्देशन दिएका छन् ।

सोमबार संसदीय दलको बैठकमा उनले संसदीय दलको अनुमतिबिना विदेश भ्रमण नगर्न पार्टीका सांसदहरूलाई निर्देशन दिएका हुन् ।

पार्टी संसदीय दलका नेता समेत रहेका ओलीले प्रमुख सचेतक र सचेतकलाई जानकारी गराएर मात्र सांसदहरू विभिन्न कार्यक्रममा जान सक्ने जानकारी गराए ।

विगतमा सांसदहरू रातो पासपोर्टलगायत काण्डमा फसेपछि पुनः सांसद हुन नपाउने गरी पार्टीले कारबाही गर्नुपरेको दृष्टान्त उनले पेस गरे । त्यसो हुन नदिन पनि सांसदहरू दलको परामर्शमा मात्र विदेश जान उपयुक्त हुने उनको भनाइ थियो ।